സംസ്ഥാന പൊലീസ് മേധാവിയാകാനുള്ള സാധ്യത പട്ടികയിൽ എഡിജിപി എംആർ അജിത് കുമാറും. കേന്ദ്രസർക്കാരിന് സമർപ്പിക്കേണ്ട ആറുപേരുടെ പട്ടികയിലാണ് എം ആർ അജിത് കുമാറും ഇടംപിടിക്കുക. സംസ്ഥാന പൊലീസ് മേധാവി എസ്.ദർവേഷ് സാഹിബ് ജൂൺ 30ന് വിരമിക്കുന്ന സാഹചര്യത്തിലാണ് പുതിയ പൊലീസ് മേധാവിയെ കണ്ടെത്താനുള്ള നടപടികൾ സംസ്ഥാന സർക്കാർ ആരംഭിച്ചത്.
നിലവിൽ ഏറ്റവും സീനിയറായ ഡിജിപി നിധിൻ അഗർവാൾ, നിലവിൽ ഐബിയുടെ സ്പെഷൽ സെക്രട്ടറിയും കേരള കേഡറിൽ രണ്ടാമനുമായ റാവാഡാ ചന്ദ്രശേഖർ, വിജിലൻസ് ഡയറക്ടർ യോഗേഷ് ഗുപ്ത, എഡിജിപിമാരായ മനോജ് ഏബ്രഹാം, സുരേഷ് രാജ് പുരോഹിത്, എം.ആർ.അജിത്കുമാർ എന്നിവരാകും കേരളം കേന്ദ്രസർക്കാരിന് സമർപ്പിക്കുന്ന പട്ടികയിൽ വരിക. എഡിജിപി മനോജ് ഏബ്രഹാം ജൂലൈ ഒന്നിന് ഡിജിപി തസ്തികയിലെത്തും. ഫയർഫോഴ്സ് ഡിജിപിയായ കെ.പത്മകുമാർ ഏപ്രിലിൽ വിരമിക്കുമ്പോൾ ഡിജിപി തസ്തികയിലെത്തേണ്ടത് സുരേഷ് രാജ് പുരോഹിതാണ്. എന്നാൽ, പ്രധാനമന്ത്രിയുടെ സുരക്ഷാ ചുമതലയുള്ള എസ്പിജിയിൽ രണ്ടാമനായ അദ്ദേഹത്തിന് ഒരു വർഷം കൂടി അവിടെ സേവനം നീട്ടി നൽകിയതിനാൽ കേരളത്തിലേക്കില്ല. ആ ഒഴിവിൽ എം.ആർ.അജിത്കുമാർ ഡിജിപി തസ്തികയിലെത്തും.
സംസ്ഥാന പൊലീസ് മേധാവിയെ തെരഞ്ഞെടുക്കുന്നതിനായി ആറു പേരുടെ പട്ടികയാണ് കേന്ദ്രസർക്കാരിന് സമർപ്പിക്കേണ്ടത്. ഇതിൽ നിന്നും മൂന്നു പേരുകൾ കേന്ദ്രം അംഗീകരിച്ച് തിരിച്ചയക്കും. കേന്ദ്രം അംഗീകരിക്കുന്ന മൂന്നുപേരിൽ ആരെ വേണമെങ്കിലും സംസ്ഥാന സർക്കാരിന് സംസ്ഥാന പൊലീസ് മേധാവിയായി അവരോധിക്കാം.
